Фавти хушунатдидагон ба мирандагони бемории саратон баробар будааст

Душанбе, 27 ноябр. (АМИТ «Ховар», Саидэҳсони Солеҳ).- Дирӯз дар Душанбе маъракаи «16 рӯзи бидуни зӯроварии хонаводагӣ» баргузор гардид. Дар ин ҷаласа, ки бо ташаббуси Лоиҳаи пешгирии зӯроварии хонаводагӣ, Кумитаи ҷавонон варзиш ва сайёҳӣ ва Кумитаи занон ва оилаи назди Ҳукумати Ҷумҳурии Тоҷикистон сурат гирифт, гуфта шуд, ки ҳолатҳои зӯроварии хонаводагӣ миёни оилаҳо дар ҷумҳурӣ кам нестанд.   Моҳира Аҳмадова, раиси маҳаллаи Шодиёнаи пойтахт, ки яке аз ширкаткунандагони ин нишаст буд, ба ин бовар аст, ки бештаре аз хушунатҳои хонаводагӣ дар оилаҳо аз ҷониби мардҳо рӯй медиҳад, зеро мард ҳамеша занро моли шахсияш медонаду ӯро мезанад, таҳқир мекунад, муомилаи хуб намекунад. Ин боис мегардад, ки бархе аз занҳо ин гуна муомиларо таҳаммул карда наметавонанд ва ба худкушӣ даст мезананд. Аммо Маърифат Шокирова, як масъули Кумитаи кор бо занон ва оилаи назди ҳукумати кишвар мегӯяд: «Тибқи шикоятҳое, ки ба онҳо расидааст, ҳарчанд бештаре аз хушунатҳо аз ҷониби мардон сар мезананд, вале дар баъзе аз ин қазияҳо занон низ бегуноҳ нестанд». Дар ҳамин ҳол Зарина Кенҷаева, равоншиноси маркази «Боварӣ», ки ба масоили хушунати хонаводагӣ сарукор дорад, афзуд: «Барои рафъи ин гуна зуҳурот миёни ҷавонон корҳои фаҳмондадиҳӣ гузаронидаанд ва кӯшиш доранд барои кам кардани он тадбирҳои муассир андешанд». Гуфта шуд, ки лоиҳаи пешгирии зӯроварии хонаводагӣ (PDV) аз ҷониби ширкати олмонии GOPA дар Тоҷикистон бо дастгирии молиявии Дафтари Швейтсария оид ба ҳамкорӣ мавриди амал қарор дошта, доир ба беҳбуди сатҳи огаҳии аҳолӣ аз мушкилоти зӯроварии оилавӣ сурат мегирад.Ёдрас мекунем, ки ҳамоиш 25-уми ноябр оғоз гардида, то 10-уми декабр идома меёбад. Дар давоми 16 рӯз дар саросари кишвар чорабиниҳои гуногун ҷараён мегиранд. Ин ҳам дар ҳолест, ки гуфта шуд дар як сония дар ҷаҳон 1 нафар бар асари хушунати хонаводагӣ ҳалок мешудааст. Ҳатто гуфта мешавад, шумораи касоне, ки аз ҳодисаҳои хушунати хонаводагӣ фавт мекунанд, ба ҳалокати гирифторони бемории саратон баробар будааст.