Мардуми тоҷик ҷоннисорони ҳифзи суботи ҷомеаро фаромӯш нахоҳад кард

Душанбе, 10 ноябр. (АМИТ «Ховар», Дилшодаи Хайруллоҳ).- Субҳи имрӯз дар Маҷмааи давлатии «Кохи Ваҳдат» бо иштироки Президенти Ҷумҳурии Тоҷикистон Эмомалӣ Раҳмон маҷлиси ботантана ба муносибати Рӯзи милитсияи тоҷик баргузор гардид.Нахуст Президенти кишвар Эмомалӣ Раҳмон зимни суханронии худ кормандон, собиқадорони мақомоти корҳои дохилӣ ва хизматчиёни ҳарбии Қӯшунҳои дохилиро бо иди касбиашон- Рӯзи милитсияи тоҷик табрику таҳният гуфта, таъкид бар он намуд, ки мақомоти милитсия тибқи таъиноти худ ҳамеша вазифаҳои мураккабу муҳими давлатиро дар самти таъмини тартиботи ҳуқуқӣ ва таҳкими қонуният ба сомон мерасонанд. Мавриди зикр аст, ки дар роҳи барқарор намудани сохти конститутсионӣ ва пойдории давлати ҷавони Тоҷикистон корманди мақомоти корҳои дохилӣ ва хизматчиёни ҳарбии Қӯшунҳои дохилӣ азму талош ва ҷонбозиҳо намуда, ҳангоми иҷрои вазифа зиёда аз 2000 нафари онҳо ҷони худро аз даст доданд. Зимни суханронии Сарвари давлат тазаккур дода шуд, ки давлату Ҳукумат ва мардуми тоҷик онҳоеро, ки ба хотири ҳифзи амният ва сулҳу суботи ҷомеа ҷони худро нисор кардаанд, ҳеҷ гоҳ фаромӯш нахоҳанд кард.