Мулоқоти Қ.Қосимов ва Т.Лонтс

Душанбе, 9 ноябр. (АМИТ «Ховар», Дилшодаи Хайруллоҳ ). – 7 ноябр дар шаҳри Душанбе мулоқоти вазири кишоварзии Ҷумҳурии Тоҷикистон Қосим Қосимов ва коршиноси калони намояндагии минтақавии Созмони маводи ғизоӣ ва кишоварзии СММ дар Туркия Томаш Лонтс баргузор гардид. Вазир дар ҷараёни мулоқот сатҳи хубу назарраси ҳамкорӣ бо созмони зикршударо қайд намуда, барои дастгирии он дар таҳияи «Барномаи ислоҳоти бахши кишоварзии ҶТ барои давраи солҳои 2012 – 2020» изҳори миннатдорӣ кард.Томаш Лонтс дар навбати худ аз мақсаду ҳадафи сафараш ба Тоҷикистон хабар дода, зикр намуд, ки вақтҳои охир ба Созмони маводи ғизоӣ ва кишоварзӣ ислоҳот ворид гардида, дар робита бо ин муносибатҳо ба тарҳрезии кӯмак ба кишварҳои аъзои ин созмон тағйир меёбанд. Бо ибораи дигар, Созмони маводи ғизоӣ ва кишоварзӣ тадриҷан аз татбиқи лоиҳаҳои алоҳида дар кишварҳои аъзои он ба усули муайян намудани афзалиятҳо барои солҳои наздиктарин ва имзои барномаҳои ҳамкории кишварҳо мегузарад.12 кишвари Аврупо ва Осиёи Марказӣ дар маркази диққати сиёсат ва дастгирии техникӣ қарор мегиранд, ки се кишвари минтақаи Осиёи Марказӣ аз қабили Қирғизистон, Тоҷикистон ва Ӯзбекистон аз ҷумлаи онҳоанд.Вазири кишоварзии Тоҷикистон зикр намуд, ки барои таҳияи пешниҳодҳо гурӯҳи муштараки корӣ таъсис дода ва пешниҳодҳо дар охири моҳи ҷорӣ мавриди муҳокима қарор дода шаванд.