17,1 миллиард сомонӣ барои некӯаҳволии мардуми кишвар

Душанбе, 11 декабр. (АМИТ «Ховар», Дилшодаи Хайруллоҳ, Афшини Муқим). — Субҳи имрӯз дар Бӯстонсарои Ҳукумати ҷаласаи Шӯрои миллии рушди назди Президенти Ҷумҳурии Тоҷикистон ва Форуми рушди Тоҷикистон баргузор гардид. Ҷаласаи Шӯрои миллии рушди назди Президенти ҶТ таҳти роҳбарии Сарвари давлат, Раиси Шӯрои миллии рушд Эмомалӣ Раҳмон ва иштироки аъзои Шӯрои миллии рушд, намояндагони Шӯрои ҳамоҳангсозии шарикони рушд, вазорату идораҳои дахлдори мамлакат, ташкилотҳои ғайридавлатӣ ва созмонҳои байналмилалӣ ҷиҳати баррасии раванди татбиқи афзалиятҳои миллӣ ва ҳадафҳои стратегии ҶТ дар сатҳи баланди ташкилӣ баргузор гардид. Президенти Ҷумҳурии Тоҷиктстон Эмомалӣ Раҳмон ҷаласаи мазкурро ифтитоҳ намуда, бо истифода аз фурсат аҳли нишаст ва тамоми мардуми кишварро ба муносибати ба тозагӣ шомил гардидани Тоҷикистон ба Созмони умумиҷаҳонии савдо таҳният гуфт ва иброз дошт, ки «Тоҷикистон афзалиятҳои миллии худро ҷиҳати густариши ҳамкориҳо ва мутобиқи принсипҳои байналмилалӣ татбиқ менамояд ва мунтазам барои устувор гардонидани муносибатҳои мутақобилаи иқтисодӣ дар минтақа ва дар сатҳи байналмилалӣ кӯшиш дорад» Дар доираи рӯзномаи ҷаласа аз ҷониби намояндагони ҳукумати ҶТ ва аъзои Шӯрои ҳамоҳангсозии шарикони рушд мубодилаи афкор оид ба равандҳои афзалиятноки рушди кишвар ва натиҷаҳои ноилгардидаи Ҳукумати ҶТ дар доираи татбиқи ҳуҷҷатҳои асосии кишвар – «Стратегияи миллии рушди ҶТ барои давраи то соли 2015» ва «Стратегияи паст кардани сатҳи камбизоатӣ барои солҳои 2010 – 2012» баргузор гардид. Ҳамчунин, муаррифӣ ва муҳокимаи масъалаҳои рушди ояндаи мамлакат дар доираи «Стратегияи баланд бардоштани сатҳи некӯаҳволии мардуми Тоҷикистон барои солҳои 2013-2015» мавриди баррасӣ қарор гирифт. Қобили зикр аст, ки дар доираи ин cтратегия таваҷҷуҳи бештар ба бахши иқтисодӣ равона гардида, ҷиҳати рушди иқтисодиёт 17,1 миллиард сомонӣ маблағ пешбинӣ гардидааст.