Хабарҳо аз хориҷи кишвар

Куштори табибон дар Покистон Душанбе, 24 декабр. (АМИТ «Ховар»).-Мувофиқи иттилои расонаи хабарии «BBC News» дар шаҳри Карочии Покистон 6 нафар корманди тибб аз ҷониби силоҳбадастони номаълум ба қатл расиданд. Мувофиқи иттилои сардори Қӯшунҳои сарҳадии Кумитаи амнияти миллии кишвар табибонро ҷинояткорон ба ҷурми ҳамкорӣ бо нерўҳои ҳукуматии Покистон нобуд кардаанд. Ҳодиса дар минтақаи Гулшан-Бунер ба вуқуъ пайвастааст. 5 нафар аз кушташудагон зан ва 1 нафар мард мебошанд. Ба гуфти сардори раёсати таъминот ва озуқавории Вазорати тандурустии Покистон табибон бар зидди бемории фалаҷ дар байни кўдакон фаъолият мебурдаанд. Русия дар иҳотаи сардӣ Душанбе, 24 декабр. (АМИТ «Ховар».-Тавре ки дар торномаи телевизиони «Russian to Day» омадааст, ҳафтаи равон як қатор шаҳру ноҳияҳои Федератсияи Русия ҳамоно дар иҳотаи сардии тоқатфарсо қарор доранд. Аз ҷумла, дар кишвари Олтой сардии ҳаво якбора ба 50 дараҷа баробар шуд. Мувофиқи иттилои ҳавошиносон, чунин вазъият чанд рӯзи дигар идома хоҳад дод. Чунин ҳолат дар вилояти Ростов низ ба назар мерасад. Дар пайи сармои тоқатфарсо қубурҳо ях баста, сокинон аз истифодаи об маҳрум гардидаанд. Чунин сардӣ ва яхбандӣ ба ҳаракати воситаҳои нақлиёт монеа эҷод намудааст. Номусоидии вазъи ҳаво дар роҳҳои вилояти Ставропол боиси зиёд шудани садамаҳои нақлиётӣ гаштааст. Дар айни ҳол даҳҳо техникаи махсус барои тоза кардани барфтўдаҳо фаъолият доранд.Тарҷумаи Иброҳими Ҳабибуллоҳ