Корҳои фаҳмондадиҳӣ дар байни аҳолии Шаҳринав

Душанбе, 6 декабр. (АМИТ «Ховар», Ибодат Давлатова).-Дирӯз бо мақсади тақвияти корҳои фаҳмондадиҳию иттилоотӣ бо раисони ҷамоат, директорони мактаб, ташкилотҳои ҷамъиятӣ, инчунин бо фаъолони ноҳия ва шахсони масъул вохӯрии кормандони Хадамоти муҳоҷирати назди Ҳукумати Ҷумҳурии Тоҷикистон дар ноҳияи Шаҳринав доир гардид.Тавре ки ба мухбири АМИТ «Ховар» аз Хадамоти муҳоҷират хабар доданд, дар мулоқот масъалаҳои шиносоӣ бо вазъи муҳоҷирони меҳнатии шаҳрвандони ҶТ дар хориҷи кишвар, пешгирии муҳоҷирати ғайриқонунӣ, баҳисобгирии муҳоҷирон-шаҳрвандони Ҷумҳурии Тоҷикистон, ҳамкорӣ бо ҷамъиятҳо ва саҳми онҳо дар рушди ноҳияҳо, ихроҷ,масъалаи миёнаравони қаллобӣ дар бозори меҳнати ФР, муҳлати тамдиди бақайдгирӣ аз 7 рӯз ба 15 рӯз, ичозати кор аз 1 сол то ба 3 сол, назорати фаъолияти муҳоҷирони меҳнатии хориҷӣ дар Ҷумҳурии Тоҷикистон, дараҷаи забондонии муҳоҷирони меҳнатӣ, касбомӯзӣ ва дигар масъалаҳое, ки ба мавзӯи муҳоҷирати меҳнатӣ марбутанд, аз сӯи кормандони ХМ дар ноҳияи Шаҳринав мавриди муҳокима ва гуфтугӯ қарор гирифтанд. «Мақсад аз ташкил ва дидору мулоқоти кормандони Хадамоти муҳоҷират бо бошандагони ин ноҳия- танзими раванди муҳоҷирати меҳнатӣ, будубоши шаҳрвандони хориҷӣ ва бурдани корҳои фаҳмондадиҳӣ ва иттилоотӣ байни аҳолӣ ва муҳоҷирони меҳнатӣ мебошад», гуфт манбаъ.