Муҳокимаи масъалаи амнияти маводи ғизоӣ

Душанбе, 14 декабр. (АМИТ «Ховар», Покиза Маҳмадбекова ). – Дар ноҳияи Рашт мизи мудаввар дар мавзӯи «Таъмини амнияти маводи ғизоӣ дар минтақаҳои кӯҳистони ҶТ» баргузор гардид.Мақсад аз ин чорабинӣ иборат аз муҳокимаи масъалаҳои умумии амнияти маводи ғизоии минтақаҳои кӯҳистони Тоҷикистон ва дарёфти роҳҳои ҳалли онҳо буд. Дар кори мизи мудаввар намояндагони раёсатҳои кишоварзӣ, хоҷагии об ва омори ҳукумати ноҳия, роҳбарони ҷамоатҳо, хоҷагиҳои деҳқонӣ, ҳамчунин олимону мутахассисони намоёни бахши амнияти маводи ғизоии ҷумҳурӣ ширкат доштанд.Раиси ноҳияи Рашт Саидмурод Абдураҳмонов зимни суханрониаш ба масоили мубрами вобаста ба амнияти маводи ғизоии ноҳия, аз ҷумла, истифодаи заминҳои лалмӣ, коҳиш ёфтани ҳосили зироатҳои кишоварзӣ ва монеаҳои роҳи рушди боғдорию чорводорӣ сухан кард.