Мулоқоти Р.Солиев бо роҳбарияти сиёсии Люксембург

Душанбе, 24 декабр. (АМИТ «Ховар», Пайрав Назаров). – Сафири Ҷумҳурии Тоҷикистон дар Гертсоггарии Бузурги Люксембург Рустамҷон Солиев дар ҷараёни сафари кориаш ба шаҳри Люксембург бо роҳбарияти олимақоми сиёсии ин кишвар чанд мулоқот анҷом дод.Аз ҷумла, Рустамҷон Солиев ва Сарвазири Люксембург Жан – Клод Юнкер масоили ҳамкории дуҷонибаро мавриди муҳокима қарор доданд. Сипас мулоқоти Сафири Тоҷикистон бо вазири корҳои хориҷии Люксембург Жан Асселборн баргузор гардид. Ҷонибҳо зимни мубодилаи афкор масоили мубрами муносибатҳои дуҷониба ва минтақавиро муҳокима намуданд. Сафири Тоҷикистон ҳамчунин бо раиси Палатаи намояндагони Люксембург Лоран Мозар мулоқот намуд. Мусоҳибон имконияти роҳандозӣ ва рушди равобити байнипарлумонии ҳар кишварро мавриди баррасӣ қарор доданд.Дар ҷараёни мулоқоти Рустамҷон Солиев бо директори генералии Палатаи савдои Люксембург Пер Грамегна масоили барқарор намудани равобити дуҷонибаи тоҷирон, ташкили ҳамоиши соҳибкорони ҳар ду кишвар ва ҳамкории судманд дар бахши сармоягузорӣ ва соҳибкорӣ мавриди муҳокима қарор гирифт.Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ ба АМИТ «Ховар» хабар доданд.