Роҳандозии барномаи ҷилавгирии тарки мактаб кардани хонандагон

Душанбе, 13 декабр. (АМИТ «Ховар», Пайрав Назаров ). – Агентии ИМА оид ба рушди байналмилалӣ (USAID) аз роҳандозии барномаи таҷрибавӣ ҷиҳати ҷилавгирии тарки мактаб намудани хонандагони мактабҳои вилояти Хатлон хабар дод. Дар ин чорабинӣ Сафири ИМа дар Ҷумҳурии Тоҷикистон Сюзан Эллиот, вазири маорифи Ҷумҳурии Тоҷикистон Нуриддин Саидов ва шахсони дигари расмии вазорати маориф ширкат доштанд.Тавре ки аз Сафорати ИМА дар Тоҷикистон хабар доданд, дар маросими ифтитоҳи расмӣ дар мактаби рақами 2 – и ноҳияи Данғара барномаи коҳиш додани сатҳи тарки мактаб намудани хонандагони синфи 9 – ум расман роҳандозӣ шуд. Сюзан Эллиот зикр намуд, ки агар хонанда таҳсилоташро дар мактаб пурра анҷом диҳад, имконияти бештари бо кор таъмин шуданро пайдо менамояд. Барномаи таҷрибавии ҷилавгирии тарки мактаб намудани хонандагон якҷоя бо мансабдорони вазорати маориф ва намояндагони макотиб тарҳрезӣ шудааст.