248 иншооти соҳаи маориф мавриди истифода қарор гирифт

Душанбе, 7 январ. (АМИТ «Ховар», Фарзона Достонзода). – 7 январ дар нишасти матбуотии ҷамъбастӣ вазири маорифи ҶТ Нуриддин Саидов иттилоъ дод, ки «дар соли 2012 аз ҳисоби тамоми манбаъҳои маблағгузорӣ дар ҷумҳурӣ 248 иншооти соҳаи маориф сохта ва мавриди истифода қарор дода шуд, ки нисбат ба соли 2011 ба миқдори 37 иншоот зиёдтар аст. Маблағи умумии иншоот 319 миллиону 908 ҳазор сомониро ташкил медиҳад». Вазири маориф инчунин зикр намуд, ки соли гузашта дар ҷумҳурӣ зиёда аз 30 муассисаи миёнаи маълумоти умумӣ мавриди таъмири асосӣ қарор гирифтанд. Н.Саидов таъкид кард, ки дар ин давра ба шуъбаҳои маорифи шаҳру ноҳияҳои ҷумҳурӣ 103 номгӯй маводи таълимӣ ба миқдори зиёда аз 2 млн. нусха ба маблағи 22 миллиону 519 ҳазору 712 сомонӣ расонида шуд.