«Омори солонаи Ҷумҳурии Тоҷикистон» нашр гардид

Душанбе, 11 январ. (АМИТ «Ховар», Покиза Маҳмадбекова). – «Омори солонаи Ҷумҳурии Тоҷикистон» нашри пурраи Агентии омори назди Президенти Ҷумҳурии Тоҷикистон буда, падида ва шароитҳои ҳаёти иқтисодӣ ва иҷтимоии мамлакатро, ки дар замони гузариш ба иқтисодиёти бозорӣ ба амал меоянд, инъикос менамояд. Аз рӯи иттилои Агентии мазкур, дар маҷмӯаи солонаи оморӣ нишондиҳандаҳои асосии иҷтимоию иқтисодии ҷумҳурӣ барои 6 сол гирдоварӣ шудаанд. Дар бораи аҳолӣ, вазъи демографӣ, тандурустӣ, маориф, ҳаёти илмию фарҳангии мамлакат маълумот пешниҳод шудааст. Дар маҷмӯа нишондиҳандаҳои ҷудогона, ки вазъияти соҳаҳои алоҳидаи иқтисодӣ, саноат, сохтмон, кишоварзӣ, нақлиёт, соҳаҳои хизматрасонии аҳолиро тавсиф мекунанд, бештар ҷой дода шудаанд. Яке аз бобҳои маҷмӯа, тавсифи умумии корхонаю ташкилотҳо, иттилооти соҳибкории хурд ва ҷараёни хусусигардониро дар бар мегирад.