Ширкати чиноӣ дар Тоҷикистон $500 млн. сармоягузорӣ мекунад

Душанбе, 19 декабр. (АМИТ «Ховар», Бекназари Абӯбакр). — Чанде қабл раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Давлаталӣ Саидов бо роҳбарияти Корхонаи саноати куҳии Тоҷикистону Чин мулоқот намуд.Аз Кумитаи мазкур иттилоъ доданд, ки зимни мулоқот зикр гардид, ки дар соли сипаригашта корхона фаъолиятро самарабахш ба роҳ монда, нақшаи истеҳсолиро барзиёд иҷро намуд. Аз оғози фаъолияти онҳо дар Тоҷикистон аз ҷониби ширкат 150 млн. доллари ИМА сармоягузорӣ ворид шудааст.Дар баробари ин, аз ҷониби сармоягузорони чиноӣ иттилоъ дода шуд, ки ширкат дар мувофиқа бо мақомоти болоии худ дар шаҳри Шанхайи Ҷумҳурии Мардумии Чин сохтмони заводи металлургиро бо назардошти на танҳо коркард ва истеҳсоли маҳсулоти металлургӣ, балки кислотаи сулфурӣ низ ба нақша гирифтааст, ки ҳаҷми сармоягузории он тақрибан 500 млн. доллари ИМА-ро ташкил хоҳад дод.Дар ин замина тарафҳо роҳҳои суръатбахшии оғози татбиқи лоиҳаи мазкур ва имтиёзу имкониятҳо барои сармоягузорон ҳангоми ба роҳ мондани ҷараёни татбиқи онро мавриди баррасӣ қарор доданд.