Муаррифии «Интернети бачагона» дар Душанбе

Душанбе, 4 феврал. (АМИТ «Ховар», Лутфия Эшонқулова).- 4 феврал дар Вазорати иқтисод ва савдои ҶТ муаррифии хизматрасонии нави «Интернети бачагона» аз аввалин интернет-провайдери Тоҷикистон — ширкати «Телеком Технолоҷи» барпо мешавад.Бино ба иттилои аз ширкати «Телеком Технолоҷи» расида, ташкилкунандагони чорабинӣ пеши худ вазифа гузоштаанд, ки дастрасии аҳолиро ба интернет беҳтар намоянд, бахусус истифодабарандагони хурдсоли кишвар низ ба интернет дастрасӣ дошта бошанд.Хизматрасонии «Интернети бачагона» дар навбати аввал барои доираи кӯдакони аз 3 то 13 –сола ба ҳисоб гирифта шудааст. Ин тарофаи махсусро интихоб намуда, волидайн ва омӯзгорон метавонанд бе ҳарос фарзандонашонро дар назди компютер танҳо гузоранд, бояд хавотир нашаванд, ки кӯдак ба ягон сомонаи номатлуб даромада, бо алоқаи дилнохоҳам банд мешавад ва ин ба асаби ӯ зарар расонида, дар оянда ба ташаккулёбии ӯ халал ворид месозад. Дар айни замон дар тарофаи мазкур зиёда аз 100 сомона ворид гардида, мундариҷаи онҳо ҳамарӯза аз ҷониби кормандони ширкат назорат бурда мешавад. Мутахассисон ҳамарӯза феҳрасти сомонаҳоро пурра мегардонанд, ҳамчунин барои бачагон шабакаи беназире ташкил кардаанд, ки он ба наздикӣ дар доираи хизматрасонии «Интернети бачагона» кори худро оғоз менамояд.