Шарики боэътимоди иқтисодӣ

Душанбе, 19 феврал.(АМИТ «Ховар», Марзия Саидова).- Дар соли 2012 гардиши мол байни Тоҷикистону Туркия беш аз 600 миллион $-ро ташкил дод, ки 493,4 миллион $ содирот ва воридот 107,2 миллион $ аст. Беш аз 36,3 % и ҳаҷми умумии молҳои содиротӣ ва 2,8 % молҳои воридотии кишвари мо бо Туркия рост меояд. Маҷмӯи молҳои содиротии Тоҷикистон ба Туркия асосан аз нахи пахта, алюминии аввалия, пӯст ва маҳсулоти пӯстӣ иборат аст. Аз Туркия ба Тоҷикистон асосан гӯшти чорвою парранда, меваҳои субтропикӣ, маводи шустушӯӣ, қолину гилемҳо, маҳсулоти пластикӣ ва резинӣ, ашё аз металҳои сиёҳ, таҷҳизот ва механизмҳо оварда мешавад. Мавриди зикр аст, ки алҳол дар Тоҷикистон 64 корхонаи муштарак бо сармояи туркӣ фаъолият менамояд, ки «Азия- Трейдинг Шипинг Со», «Аге-Текар», «Комбинед –Аге-Текар», «Миск Интернейшнл ЛТД», «Текмаксан», «Центр Азия Дистрибюшин», «ЕNКА» «Озгюн Иншаат Таахют ве Иншаат» «Осмони соф» аз ҳамин қабиланд. Ин корхонаҳои муштарак асосан дар бахшҳои тиҷорат, сохтмон ва хизматрасонӣ фаъолият менамоянд.