Реҷаи додани барқ ба аҳолӣ ба 18 соат расид

Душанбе, 6 март. (АМИТ «Ховар», Кристина Эрлих). – Бо супориши Ҳукумати Ҷумҳурии Тоҷикистон ШКСХ «Барқи тоҷик» соатҳои ба аҳолии минтақаҳои Тоҷикистон додани барқро зиёд намуд. Акнун аҳолии минтақаҳои Тоҷикистон ҳар шабонарӯз баробари 18 соат нерӯи барқ мегиранд. Дар ин бора роҳбари дафтари матбуоти ШКСХ «Барқи тоҷик» Нозир Ёдгорӣ ба мухбири АМИТ «Ховар» хабар дод.Мувофиқи суханони мавсуф, реҷаи рӯзона дар ҳамаи минтақаҳои ҷумҳурӣ пурра қатъ шудааст. Пештар минтақаҳои кишвар дар як шабонарӯз муддати 12 соат нерӯи барқ мегирифтанд. Ҳоло онҳо ҳар шабонарӯз аз соати 5:00 субҳ то соати 23:00 шом 18 соатӣ нерӯи барқ мегиранд. Қобили зикр аст, ки реҷаи нерӯи барқ дар кишвар дар даҳаи аввали моҳи октябри соли 2012 ҷорӣ шуда буд.