Омодагии мутахассисони Амрико дар кофтукови Малика ва Сабина

Душанбе, 15 апрел. (АМИТ «Ховар»).- Вазири корҳои дохилии Ҷумҳурии Тоҷикистон Рамазон Раҳимов бо сафири ИМА дар Тоҷикистон Сюзан Эллиот вохӯрда, тарафҳо масаъалаҳои таъмини амният дар минтақа, алалхусус мубориза бар зидди терроризм ва экстремизи байналхалқӣ, қочоқи маводи мухаддир, яроқ ва хариду фурӯши одамон табодули афкор намуда, омодагии худро ҷиҳати татбиқи мақсадҳои мазкур изҳор намуданд.Тавре ки сомонаи расмии ВКД хабар медиҳад, дар мулоқот сафири ИМА дар Тоҷикистон Эллиот Сюзан зикр намуд, ки барои инкишофи муносибатҳои дӯстона ва таҳкими ҳамкориҳои судманд дар самти ошкору пайгирӣ намудани гуруҳҳои ҷинояткор, бахусус кофтукови гумгаштагони ноболиғ Малика Аралова ва Сабина Аралова омодааст намояндагони Бюрои федералии тафтишотиро (ФБР) аз Амрико, ки таҷрибаи бою ғанӣ доранд ва бо тамоми таҷҳизоти замонавӣ дар самти муайян намудани гумгаштагон ва шахсони дар кофтуков қарордошта истифода мешаванд, барои ёрии амалӣ расонидан ба Тоҷикистон даъват намоянд.Ин пешниҳод аз ҷониби вазири корҳои дохилии Ҷумҳурии Тоҷикистон пазируфта шуда, тарафҳо ба мувофиқа расиданд, ки ҳамкориҳои мутақобилан судмандро дар ин замина инкишоф диҳанд.Инчунин дирӯз ҳангоми вохӯрии намояндагони Вазорати корҳои дохилӣ бо мутахассисони сафорати Амрико ва зимни гуфтугӯи телефонӣ бо мутахассисони Бюрои федералии тафтишотӣ дар шаҳри Алмато онҳо омодагии худро барои расонидани кӯмаки техникӣ ҷиҳати пайдо кардани гумгаштагон ва шахсоне, ки дар кофтуков қарор доранд, ба Вазорати корҳои дохилӣ изҳор намуданд.