Баргузории «Ҳифз-2013» дар Суғд

Душанбе, 26 сентябр. (АМИТ «Ховар», Лутфия Эшонқулова).- Машқҳои муштараки низомӣ таҳти унвони «Ҳифз-2013» дар машқгоҳи «Чоруқдарон»-и гарнизони ҳарбии Суғд аз 20 то 30 сентябр доир карда мешавад.Тавре ки маркази матбуоти Вазорати мудофиаи ҶТ хабар медиҳад, дар машқҳо ҷузъу томҳои сохторҳои қудратии мамлакат, ки дар вилояти Суғд мустақаранд ва як дастаи тирандози Қувваҳои Мусаллаҳи Ҷумҳурии Қирғизистон ширкат варзида истодаанд. Дар машқҳои муштараки зидди террористӣ беш аз 500 нафар хизматчиёни ҳарбии Қувваҳои Мусаллаҳи Тоҷикистону Қирғизистон ҷалб гардида, чархболҳои ҳарбӣ, техникаҳои вазнини зиреҳпўши ҷангӣ, тӯпҳои навъи гуногун ва яроқу аслиҳаи мухталифи оташфишони ҳарбӣ истифода мешаванд. Ҳадаф аз баргузории машқҳои муштараки ҳарбӣ- ин тарҳрезии назару муносибати ягонаи ҷангӣ дар ташкили амалиёти муштараки зидди террористӣ дар шароити куҳистон, ҳамоҳанг намудану сайқал додани маҳорати касбии ҷузъу томҳо дар самти омодагӣ ва дар амал татбиқ намудани амалиёти зиддитеррористӣ, таъмини ҳифзи сарҳади давлатӣ ва бехатарӣ дар минтақа, табодули таҷрибаомузӣ дар таҳия, ташкил ва баргузории унсурҳои зиддитеррористӣ мебошад. Машқҳои муштарак таҳти роҳбарии сардори Ситоди генералии Қувваҳои Мусаллаҳи Ҷумҳурии Тоҷикистон генерал-лейтинант Рамил Нодиров ҷараён мегиранд. Ҷараён ва даври ниҳоии машқҳои муштаракро роҳбарон ва намояндагони низомии ду кишвар назорат менамоянд.