Ифтитоҳи Кохи маърифати шаҳри Ваҳдат

Душанбе, 3 октябр. (АМИТ «Ховар»).Дар маркази шаҳри Ваҳдат бо иштироки Президенти кишвар Эмомалӣ Раҳмон, ҳамчунин бинои навбунёди Кохи маърифат мавриди баҳрабардорӣ қарор гирифт.Чунонки аён гардид, дар Кохи маърифати шаҳри Ваҳдат толори бузурги маҳфилҳои фарҳангӣ бо 170 ҷойи нишаст, 2 толори махзани китоб, толори калони китобхонӣ, чопхонаи дорои дастгоҳу таҷҳизоти муосир барои ба табъ расондани маводи гуногуни чопӣ, утоқҳои кории бахши занон ва ҷавонони мақомоти иҷроияи ҳокимияти давлатии шаҳр, коргоҳҳои рӯзномаи маҳаллии Шаҳриёр ва маҷаллаи Бахтофарони Ваҳдат ва шуъбаи Иттифоқи Нависандагони ҷумҳурӣ дар шаҳри Ваҳдат ҷойгир шудаанд.Сарвари давлат Эмомалӣ Раҳмон ҳамроҳи намояндагони шоирону нависандагон ва дигар зиёиёни эҷодкори кишвар бо шароити кору эҷод дар ин муассисаи фарҳангу маърифат бевосита шинос шуда, ба тарҳи биноҳо ва сифати сохтмону таҷҳизот баҳои баланд дод.Дар ин бора ба АМИТ «Ховар» аз Хадамоти матбуоти Президенти Ҷумҳурии Тоҷикистон иттилоъ доданд.