Инъикоси таърихи миллат дар осорхонаҳо

Душанбе, 2 ноябр. (АМИТ «Ховар», Раъно Нусратуллоева).-Бо мақсади шиносоӣ бо фаъолияти осорхонаҳои мактабӣ ва расонидани ёрии методӣ кормандони илмии Осорхонаи Академияи таҳсилоти Тоҷикистон (АТТ) Саодат Фаткуллоева ва Қурбоналӣ Гадоев тӯли як ҳафта аз осорхонаҳои ноҳияҳои Восеъ ва Ховалинг дидан намуданд.Кормандони осорхона аз осорхонаҳои мактабии таърихӣ- кишваршиносии рақами 7-и қишлоқи Гулистони ноҳияи Восеъ дидан намуданд. Дар осорхонаи мактабӣ нигораҳои дохили осорхона 1400 — номгӯйро ташкил медиҳанд. Осорхона аз ҷиҳати нигораҳои ҷамъшуда ғанӣ буда, вале ба шуъбаҳо ҷудо карда нашудааст.Бинои осорхонаи таърихӣ-кишваршиносии №17-и ноҳияи Восеъ барои ба шуъбаҳо ҷудо кардани нигораҳо хурдӣ мекунад. Аз гуфтаҳои мудири осорхона Умар Ҳусейнов маълум гашт, ки як қисми нигораҳоро аз сабаби нарасидани ҷой дар хонааш нигоҳ медорад. Ба осорхонаи мактабӣ ҳамаи омӯзгорон аъзо буда, дар ҷараёни таълими фанҳои адабиёт, таърих, ҷуғрофия, кимиё, таърих аз нигораҳо истифода мебаранд ва инчунин дар дохили осорхона машғулият мегузаронанд.Инчунин кормандони осорхонаи АТТ аз Осорхонаи ба номи Восеи ноҳияи Ховалинг дидан карданд. Осорхона ба шуъбаҳо ҷудо шуда, дар он нигораҳо ҳаёт ва фаъолияти қаҳрамони халқи тоҷик Восеъро инъикос менамоянд.Омӯзгорон аз ин воситаҳои аёнӣ пурра истифода бурда, хонандагонро дар руҳияи ватандӯстӣ, инсондӯстӣ, ҷасурӣ тарбия менамоянд. Инчунин дар ин ҷо нигораҳо ва бозёфтҳои кишоварзӣ, кишваршиносӣ, асбобу анҷоми ҳарбии қадимӣ ва ороишӣ мавҷуданд. Мудири осорхона Раҷабалӣ Камолов, набераи Восеи қаҳрамон аст. Сарвари осорхона доимо дар ҷустуҷӯ ва дар талоши бартараф кардани камбудиҳо мебошад. Зимни сафари хизматӣ кормандони илмии Осорхонаи Академияи таҳсилоти Тоҷикистон барои беҳтар шудани сифати кори осорхонаҳои мактабӣ, ки дар таълим ва тарбияи хонандагон нақши муҳим мебозанд, пешниҳодҳои судманд ироа намуданд.