Мӯсоев: Татбиқи ҷазо кам мешавад

Душанбе, 22 ноябр. (АМИТ «Ховар», С. Солеҳ ).- Одинахон Мӯсоев, сармутахассиси Маркази таълими судяҳо дар назди Шӯрои адлия гуфт, таъйини ҷазои ҷиноӣ нисбат ба маҳкумшудаҳо ба давлат зарари иқтисодӣ мерасонад. Ӯ афзуд, ки яке аз ҷанбаҳои барномаи ислоҳоти суди ҳуқуқӣ, ин кам кардани иҷрои ҷазои ҷиноӣ аст: “Шояд дар таҳрири нав бисёртар ҷазоҳо дар шакли ҷарима татбиқ шаванд”. Ба гуфтаи Мӯсоев бояд пешбинӣ шавад, ки ҷаримаи маъмурӣ аз ҷаримаи ҷиноӣ тафовут дорад, зеро баъзе ҷазоҳое дар қонунгузории ҷиноӣ пешбинӣ шудаанд, ки аз Қонуни асосӣ бармеоянд.Одинахон Мӯсоев афзуд, ки барқарор намудан ё ташкили судҳои рафиқона зарур аст, зеро ин гуна судҳо метавонанд ба судҳои шаҳру ноҳиявӣ тақвият бахшанд ва бештаре аз нофаҳмиҳое, ки миёни оилаҳо, бародарон сар мезананд, на судҳои амалкунанда, балки додгоҳҳои рафиқона метавонанд онҳоро баррасӣ кунанд. Ва ба ин васила зарурати шикоятҳои зиёд ба судҳои болоиву доғдор намудани оилаҳову бародарон намемонад.