Даъвати Тоҷикистон ба Форуми дуюм

Душанбе, 3.04.2014. (АМИТ «Ховар», Лайло Тоирӣ).- Мулоқоти вазири рушди иқтисод ва савдо Шариф Раҳимзода бо ҳайати намояндагони Бонки ҷаҳонӣ таҳти роҳбарии Намояндаи доимии бонки мазкур дар Ҷумҳурии Тоҷикистон хонум Марша Олив дар Душанбе баргузор гардид.
Дар ҷараёни мулоқот ҷонибҳо атрофи Форуми дуюми Осиёи Миёна оид ба масъалаҳои тағйироти иқлим: «Дар роҳи муваффақгардии устувории минтақавӣ ба тағйироти иқлим», ки баргузории он 13-15 майи соли ҷорӣ дар шаҳри Алмаатои Ҷумҳурии Қазоқистон дар назар аст, мубодилаи афкор намуда, чорабинии мазкурро муҳим ва манфиатнок ҳисобиданд.
Вобаста ба ин дар доираи ин чорабинӣ 15 май ҷаласаи сатҳи баланд дар мавзӯи «Таҳияи барномаҳои миллӣ ва минтақавӣ оид ба таъмини устуворӣ ба тағйироти иқлим барои Осиёи Миёна» гузаронида мешавад, ки ба он ҷиҳати ширкат намояндагони Ҳукумати Ҷумҳурии Тоҷикистон аз ҷониби ҳайати Бонки ҷаҳонӣ расман даъват шудаанд.