Иди зафар муборак!

Душанбе, 30.04.2014.(АМИТ «Ховар», Мавҷуда Анварӣ). —  Рӯзи 9-майи соли ҷорӣ дар Ҷумҳурии Тоҷикистон  69-солагии  ҷашни Ғалаба бар фашизм таҷлил мегардад. Ин рӯз дар саросари  кишвар чун рӯзи истироҳат эълон шудааст. 
Тавре ки ба мо аз Федератсияи иттифоқҳои касабаи мустақили Тоҷикистон иттилоъ доданд, чун 9 май ба рӯзи муқаррарии корӣ -рӯзи ҷумъа рост меояд, мардуми тоҷик як рӯз истироҳат мекунанд. Рӯзҳои 10 ва 11 май рӯзҳои муқаррарии истироҳатиянд. 
Ёдовар мешавем, ки 8 майи соли 1945 Германия ба санади таслимшавӣ имзо гузошт. Баъд аз ин ҳамасола  9 май ҳамчун рӯзи иди Ғалаба таҷлил мегардад. Дар таъмини ғалабаи таърихӣ дар баробари ҳамаи халқҳое, ки бар зидди истибдоди фашистӣ бархоста буданд, халқи Тоҷикистон низ саҳми ба худ муносиб гузоштааст. Беш аз 300 ҳазор нафар фиристодаи Тоҷикистон дар ҷабҳаҳои мубориза шуҷоату мардонагӣ нишон дода, 92 ҳазор нафараш дар майдонҳои набард ҳалок шуд. Аз миёни фарзандони Тоҷикистон, ки барои ҷанг ба зидди фашистони олмонӣ фиристода шуданд, 55 нафари онҳо бо унвони Қаҳрамони Иттиҳоди Шӯравӣ сарфазор гардиданд, ки ин унвони баландтарини он замон маҳсуб мешуд.