Баррасии 50 масъала дар Маҷлиси миллӣ
Душанбе, 17.07.2014.(АМИТ «Ховар», Марзия Саидзода).-Беш аз 50 масъалаи фарогири самтҳои афзалиятноки ҳаёти сиёсию иқтисодӣ ва иҷтимоию фарҳангии кишвар дар ҷараёни иҷлосияи ҳаждаҳуми Палатаи болоии Парлумони ҷумҳурӣ, ки 17 июл дар Душанбе таҳти раёсати Маҳмадсаид Убайдуллоев-раиси Маҷлиси миллии Маҷлиси Олии Ҷумҳурии Тоҷикистон доир шуд, баррасӣ ва ҷонибдорӣ гардиданд. Аъзои Маҷлиси миллӣ 10 қонуни наву мукаммали Ҷумҳурии Тоҷикистон, аз қабили Қонунҳои конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон», «Дар бораи Суди конститутсионии Ҷумҳурии Тоҷикистон», Қонунҳои Ҷумҳурии Тоҷикистон «Дар бораи сирри давлатӣ», «Дар бораи муқовимат ба савдои одамон ва расонидани кӯмак ба қурбониёни савдои одамон», «Дар бораи ҳуҷҷатҳои тасдиқкунандаи шахсият», «Дар бораи ҳимоя ва дастгирии давлатии соҳибкорӣ», «Дар бораи фаъолияти бонкии исломӣ», Дар бораи шикор ва хоҷагии шикор», «Дар бораи адабиёти таълимӣ» ва «Дар бораи фаъолияти ратсионализаторӣ»-ро матраҳ ва ҷонибдорӣ карданд. Раисони Кумитаҳои Маҷлиси миллӣ Худоёрзода Бахтиёр Тавар, Гулмаҳмадзода Давлатшоҳ Курбоналӣ, Тағойзода Саймурод Иброҳим, Убайдулло Қурбонов ва Раҳимӣ Фарҳод зимни тавзеҳи масъалаҳои баррасишуда, зикр намуданд, ки қонунҳои мазкур бо мақсади такмилу мукаммалгардонӣ ва мутобиқсозии онҳо ба санадҳои меъёрии ҳуқуқии Ҷумҳурии Тоҷикистон, таҳия ва баррасию ҷонибдорӣ гардида, ҷиҳати татбиқи ислоҳоти судию ҳуқуқӣ дар кишвар, таҳкими волоияти қонун, дастгирии соҳибкорӣ, рушди соҳаи бонкдорӣ, муқовимат бо ҷиноятҳои коррупсионӣ ва соири масъалаҳои вобаста ба пешрафти ҳаёти иқтисодию иҷтимоии ҷомеа нақши муассир мегузоранд. Дар иҷлосияи ҳаждаҳуми Маҷлиси миллӣ ҳамзамон номи баъзе деҳаю деҳоти ноҳияҳои вилояти Хатлон ва ноҳияи Файзобод тағйир дода шуда, ҳамзамон Маҷлиси миллии Маҷлиси Олии Ҷумҳурии Тоҷикистон дар асоси пешниҳоди Прокурори генералии Ҷумҳурии Тоҷикистон Салимзода Шерхони Одина оид ба ҷавобгарии ҷиноятӣ кашидан ва ба ҳабс гирифтани судяи Суди Олии иқтисодии Ҷумҳурии Тоҷикистон Ҷ. Исроилов ризоият дод.