«Парвоз»-и Тоҳири Муҳаммадризо

Душанбе, 31.07.2014. (АМИТ «Ховар», Раъно Нусратуллозода).-Дар нашриёти «Истеъдод» китоби нави адиби шинохтаи тоҷик Тоҳири Муҳаммадризо таҳти унвони «Парвоз» ба табъ расид. Тавре ки аз Вазорати фарҳанги ҷумҳурӣ иттилоъ доданд, китоб романи тозатаълифи «Рӯзҳои Худо тезгузаранд…», қиссаи «Муноҷот», ҳикоятҳои «Парвоз», «Руъёи Балотах», «Корномаи қаландар», песаҳои «Ишқи парӣ», «Диёри дилҳои хаста» ва «Нури сеҳрангези фонусҳо»-ро дар бар мегирад. Асарҳои нависанда аз боби тақдири пурихтилофи инсонҳое ҳикоят мекунанд, ки дар гирдоби воқеоти солҳои охири асри XX обутоб ёфта, ҳастии худро ташаккул додаанд. Боиси тазаккур аст, ки романи «Рӯзҳои Худо тезгузаранд …» аз лиҳози ҳам мавзӯю мундариҷа ва ҳам пешниҳод ҷолиб буда, сухани тозае дар насри муосири тоҷик мебошад.