Ҷашни 20-солагии наҷотбахшони тоҷик
Душанбе, 15.08.2014. (АМИТ «Ховар», Муқаддас Темурзода).- Бахшида ба 20-умин солгарди таъсиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон имрӯз дар кумитаи мазкур маҷлиси тантанавӣ баргузор гардид.Тавре ки котиби матбуотии КҲФ Ориф Нозимов ба хабарнигори АМИТ «Ховар» иттилоъ дод, дар назди ҳозирин роҳбари кумита генерал-полковник Хайриддин Абдураҳимов оид ба дастовардҳои наҷотдиҳандагони тоҷик ва вазифаҳои асосии онҳо сухан гуфт.Сипас аз ҷониби Хайриддин Абдураҳимов як зумра собиқадорони соҳа бо медалҳои ҷашнии «20-солагии КҲФ ва МГ Тоҷикистон» ва афсарони фаъоли кумита бо ифтихорномаҳо сарфароз гардиданд. Сарчашма дар фарҷом хабар дод, ки бахшида ба ин ҷашни пуршукӯҳ рӯзи 17 август дар Театри опера ва балети ба номи С. Айнӣ маҷлиси тантанавӣ ва контсерти устодони санъат баргузор мегардад.