Бунёди корхонаҳо бо истифода аз маблағҳои Русия
Душанбе, 14.08.2014. (АМИТ «Ховар», Марҳабои Азамат). — Тавре ки аз Сафорати Федератсияи Русия дар Ҷумҳурии Тоҷикистон ба АМИТ «Ховар» хабар доданд, Федератсияи Русия чанд сол боз шарики Тоҷикистон дар бахши маблағгузорӣ ба шумор рафта, барои рушди иқтисодиёти кишвар беш аз 1 миллиарду 600 миллион доллари ИМА сарф намудааст. Алҳол дар ҳудуди Тоҷикистон беш аз 130 корхонаи муштарак бо иштироки Русия фаъолият дорад. Назар ба хабари манбаъ, даромади буҷети федералии Русия аз фурӯши маҳсулоти нафт ба Тоҷикистон аз моҳи ноябри соли 2013 қариб 300 миллион доллари ИМА — ро ташкил дод. Ҳар сол муҳоҷирони Тоҷикистон, ки дар Федератсияи Русия фаъолият доранд, ба кишвар маблағи ҳангуфтро интиқол медиҳанд, ки ин ба вазъи иҷтимоию иқтисодии кишвар таъсири мусбат мерасонад. Масалан, соли 2013 муҳоҷирони тоҷик аз Русия ба Тоҷикистон 4 миллиарду 200 миллион доллари ИМА интиқол доданд.