Чаро низомиёни рус ба куштор даст заданд?

Душанбе, 27.08.2014. (АМИТ «Ховар», Мавҷуда Анварӣ).- Вазорати корҳои дохилаи кишвар бо гумони даст доштан дар ҷинояти куштор ду нафар низомии Пойгоҳи ҳарбии 201 Вазорати мудофиаи Федератсияи Русия дар Ҷумҳурии Тоҷикистонро дастгир намуд. 
Ёдовар мешавем, ки 19-уми августи соли 2014, тахминан соати 01.30 дақиқа дар лаби кӯли деҳаи Чимтеппаи ноҳияи Рӯдакӣ, дар дохили мошини  тамғаи «Opel Astra», рақами давлатиаш ТҶ 07-19 АН 01 ҷасади шаҳрванд Тешабоев Раҳимҷон, соли таваллудаш 1978, истиқоматкунандаи шаҳри Душанбе бо аломатҳои марги маҷбурӣ, ҷароҳатҳо дар қисмати гардан бо истифода аз олоти халандаву бурранда дарёфт гардид.
Тибқи иттилои сомонаи расмии ВКД, ҳамчун гумонбар дар содир намудани ҷинояти куштор шаҳрвандони Федератсияи Русия Сахапов Илдар Масхутович, собиқ сардори гурӯҳи қисми низомии 31691 Пойгоҳи  ҳарбии 201 Вазорати мудофиаи Федератсияи Русия дар Ҷумҳурии Тоҷикистон ва Басимов Федор Рифанович, муовини қумандони взводи қисми низомии 31691 пойгоҳи  мазкур дастгир шуданд.
Номбурдагон дар ҳабси пешакӣ қарор дошта, нисбат ба онҳо корҳои тафтишотӣ идома доранд.