Иншоотҳои ҷашнии Душанбе

     Душанбе, 28.08.2014.(АМИТ «Ховар», Марзия Саидзода).-Дар остонаи ҷашни Истиқлолияти давлатии Ҷумҳурии Тоҷикистон дар Душанбе маҷмӯи иншоотҳои ҷашнӣ мавриди баҳрабардорӣ қарор дода мешаванд, ки онҳо хуштарҳу замонавӣ буда, дар доираи Нақшаи асосии шаҳри Душанбе аз ҳисоби буҷети шаҳр ва соҳибкорон  бунёд  шудаанд.
      Меҳмонхонаи панҷситорадори «SHERATON» дар масоҳати қариб 25 000 метри мураббаъ, Маҷмаи савдои муосири «Пойтахт-90, ки дар масоҳати умумии беш аз 20 000 метри мураббаъ доман густурдааст, ба феҳристи иншоотҳои ҷашнии пойтахт ворид гардидаанд.
 Назар ба иттилои Шавкат Саидов -котиби матбуотии  раиси шаҳри Душанбе иншоотҳои навсохти замонавӣ дар остонаи таҷлили ҷашни Истиқлолияти кишвар дар маросими ботантана ба истифода дода мешаванд. Бо мавриди баҳрабардорӣ қарор гирифтани ин иншоот дар пойтахт беш аз 1500 нафар бо ҷои кори доимӣ  таъмин мегарданд. Ҳамзамон ба истифода додани биноҳои баландошёнаи истиқоматии навсохт, ки дар бархе аз кӯчаю қасабаҳои   пойтахт бунёд шудаанд, дар назар аст.