Истеҳсоли 500,5 тонна асал дар шаш моҳ

Душанбе, 15.08.2014. (АМИТ «Ховар», Зарангези Латиф).-Ба иттилои Вазорати кишоварзии кишвар дар ҷумҳурӣ соли равон ҷиҳати рушди соҳаи асалпарварӣ аз ҳисоби буҷети ҷумҳурӣ 400 ҳазор сомонӣ ҷудо гардид, ки бо ин маблағ 200 оилаи занбӯри асал бо ҳамаи таҷҳизот, инчунин доруворӣ ва хӯрокӣ харид гардида, дар мувофиқа бо мақомоти иҷроияи маҳаллии ҳокимияти давлатии шаҳру ноҳияҳо ба занбӯрпарварон дастрас шуд. Бояд зикр намуд, ки аз ҳисоби маблағи мазкур харидорӣ намудани сехи шикастани кристализатсия ва дар зарфҳо ҷобаҷокунии асал ва 350 модарзанбӯри зотӣ аз марзи ҷумҳурӣ дар назар аст.Мувофиқи маълумотҳои оморӣ то 1-уми июли соли равон дар ҳамаи шаклҳои хоҷагидорӣ 500,5 тонна асал истеҳсол шудааст, ки нисбат ба ҳамин давраи соли гузашта 39,4 тонна зиёд аст.