Парвози «Андалеб»-и ҳунар анҷом ёфт
Душанбе, 21.08.2014. (АМИТ «Ховар», Раъно Нусратуллозода).- Дирӯз дар Филармонияи давлатии Тоҷикистон ба номи Акашариф Ҷӯраев гулчини барномаи ҳунарии шаҳру ноҳияҳо, ки дар Фестивал — озмуни ҷумҳуриявии телевизионии эҷодиёти халқ «Андалеб-2014 иштирок намуданд, баргузор гардид. Ҳаваскорони шаҳру ноҳияҳои ҷумҳурӣ баромадҳои беҳтарини консертии худро пешкаши тамошобинон гардонданд. Мувофиқи холҳои гирифтаи ҳаваскорон дар озмун ҷои аввалро ноҳияи Синои шаҳри Душанбе, Ҳисор ва шаҳри Ваҳдат соҳиб гаштанд. Ҷойи дуюм насиби ноҳияҳои Тоҷикобод, Зафаробод ва Фархор гардид. Ҷои сеюм ба ҳаваскорони шаҳрҳои Кӯлоб, Хуҷанд ва ноҳияи Шуғнон дода шуд.
Намояндагони ҳамаи шаҳру ноҳияҳо аз ҷониби Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, Ширкати «Рухом», ҶДММ «Ёқут- 2000», Ҳукумати шаҳри Душанбе, Вазорати кишоварзии Ҷумҳурии Тоҷикистон, Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Вазорати меҳнат, муҳоҷират ва шуғли аҳолии Ҷумҳурии Тоҷикистон, Вазорати фарханги Ҷумҳурии Тоҷикистон бо Диплом ва туҳфаҳои хотиравӣ қадрдонӣ шуданд.
Ҳадаф аз баргузории Фестивал-озмуни ҷумҳуриявии телевизионии эҷодиёти халқ «Андалеб-2014» пайдо намудани истеъдодҳои нав, тарбияи насли ҷавон дар руҳияи ватандӯстиву хештаншиносӣ, дӯстиву рафоқат, эҳёи урфу одатҳои қадимии мардуми тоҷик мебошад.