Тӯҳфаи «Истиқлол» ба ҷавонон

Душанбе, 14.08.2014. (АМИТ «Ховар», Некрузи Муҳаммадсодиқ).-Бахшида ба Рӯзи варзишгарон, ки ҳар сол 10 август таҷлил мешавад, роҳбарияти дастаи футболи «Истиқлол»-и Душанбе иқдоми хайреро амалӣ намуд. Аз ҷониби клуби мазкур ба Кумитаи ҷавонон, варзиш ва сайёҳии назди Ҳукумати ҷумҳурӣ 24 компютер (аз ҷумла 4 ноутбук ) ва 4 принтер тӯҳфа карда шуд.Дар шароити имрӯз истифодаи технологияҳои муосир дар ҳаёти ҷавонон ва татбиқи сиёсати давлатии ҷавонон нақши муайян дорад. Аз ин рӯ, саҳми роҳбарияти клуби футболи “Истиқлол” дар таҷҳизи Кумитаи ҷавонон, варзиш ва сайёҳӣ бо компютерҳои муосир иқдоми наҷиб буда, дар пешравии кори онҳо мусоидат хоҳад кард.Раиси Кумитаи ҷавонон, варзиш ва сайёҳӣ Аҳтам Абдуллозода ба роҳбарияти клуби футболи «Истиқлол» барои дастгирии ҷавонони кишвар изҳори сипос намуда, ба ҳайати даста дар қувваозмоиҳои ҷумҳуриявию байналмилалӣ пирӯзиҳо таманно намуд.