Иншоотҳои нав дар Хатлон

Душанбе, 11.09.2014. (АМИТ «Ховар»,  Мурод  Сотиев). – Дар  ноҳияҳои  вилояти  Хатлон  ба  ифтихори  23 – юмин  солгарди Истиқлолияти  давлатӣ ва  20 – солагии  қабули Конститутсияи  Ҷумҳурии  Тоҷикистон иншоотҳои  гуногуни  ҷашнӣ  мавриди  истифода  қарор  гирифтанд.
Аз ҷумла,  дар ҷамоатҳои   деҳоти  Наврӯз ва  Истиқлоли  ноҳияи  Носири  Хусрав  ду  нуқтаи  фурӯши  сӯзишворию  газ,  дорухонаи  байторӣ ва бунгоҳи тиббӣ  ба  истифода дода, дар  ҷамоати  деҳоти  Фируза  мағозаи  нав кушода шуд.
Дар  ноҳияи  Восеъ  барои  бунёди  иншоотҳои  мухталиф  соҳибкорони  маҳаллӣ  ҳарчӣ  бештар  ҷалб  мешаванд. Бо  ибтикори  соҳибкор  Ҳоким  Холов  дар   кӯчаи  ба номи  А.Мирзоеви  шаҳраки  Восеъ  маркази  савдо  бунёд  гардид, ки  арзиши  лоиҳавиаш  520  ҳазор  сомониро  ташкил  медиҳад. Соҳибкор  Аҳмадхон  Маҳмадназаров  барои эъмори  маркази  дигари тиҷоратӣ  беш  аз  560  ҳазор  сомонӣ  сарф  намуд. Дар  ин  ноҳия  ҳамчунин  бинои  намояндагии  Ҷамъияти  саҳомии  кушодаи «Тоҷиксодиротбонк»  сохта  шудааст. 
Дар  ноҳияи  Ҷилиқул  аз  аввали  сол  14  иншооти нави  ҷашнӣ,  аз  қабили корхонаи  истеҳсоли асфалт мавриди  истифода  қарор  гирифт, ки  иқтидори  истеҳсолиаш  дар  як  соат  35  тоннаро ташкил  медиҳад. 
Ҳамчунин  дар  ҷамоатҳои  гуногуни  ноҳияи  мазкур  бунгоҳҳои тиббӣ, биноҳои  маъмурӣ,  синфхонаҳои нав,  марказҳои  савдо ва   майдончаҳои   варзишӣ  бунёд шудаанд.