Мавқеи Кумитаи ҳифзи муҳити зист дар давраи ҷаҳонишавӣ

Душанбе, 26.0,2014 (АМИТ, «Ховар», Назири Назир).- 25-уми сентябри соли ҷорӣ дар Кумитаи ҳифзи муҳити зисти назди Ҳукумати Ҷумҳурии Тоҷикистон бо иштироки муовини раиси кумита Ойхон Шарифова, сардорони бахшҳо ва дигар мутахассисону кормандони воҳидҳои сохтории  кумитаи мазкур семинари омӯзишии навбатӣ доир гардид. 
Мавзӯи семинар «Мавқеи давлатии Кумитаи ҳифзи муҳити зист дар давраи ҷаҳонишавӣ, таърихи  ин мақом  ва вазифаю талаботи имрӯзаи он» буда, аз ҷониби сардори Маркази ахбори экологӣ Гулрухсор Тиллоева  гузаронида шуд. 
Мавзӯи семинар, ки дар шакли муаррифӣ ва бо сабки баёни содда ҷараён гирифт, диққати иштирокдоронро ба худ ҷалб намуд. Сипас  дар доираи мавзӯи матраҳшуда суолу ҷавоб сурат гирифта,  командони собиқадор андешаҳои хешро  ҷиҳати равшан сохтани паҳлӯҳои мавзӯи мавриди назар баён доштанд. 
Дар  семинар муовини раиси кумита О. Шарифова дар масъалаи мавқеи давлатии  Кумита дар замони ҷаҳонишавӣ сухан гуфта, зикр кард, ки ҳар як корманди соҳа бояд аз таҷрибаву коргузории бахши экологии  давлатҳои тараққикардаи ҷаҳон ба хубӣ огоҳ бошад ва аз таҷрибаҳои пешқадами ҷаҳон дар фаъолияти худ барои беҳбудии кор истифода намояд.