«Пойтахт-90» дарҳои худро ба муштариён боз менамояд

   Душанбе, 4.09.2014.(АМИТ «Ховар», Марзия Саидзода).-Маҷмааи  савдои «Пойтахт-90», ки бо харҷи беш аз 205 миллион сомонӣ дар  маркази Душанбе сохта шудааст, 5 сентябр дар остонаи ҷашни Истиқлолияти давлатии Ҷумҳурии Тоҷикистон ба истифода дода мешавад. Интизор меравад, ки дар расми ифтитоҳи ин маҷмааи савдои замонавӣ Президенти ҷумҳурӣ Эмомалӣ Раҳмон ва шаҳрдори Душанбе ширкат намоянд.
         Маҷмааи савдои муосир дар кӯчаи «Меҳнат»-и ноҳияи  Исмоили Сомонии Душанбе дар масоҳати  беш аз 17 ҳазор метри мураббаъ бунёд гардида, аз се ошёна ва фурӯшгоҳи тобистона бо масоҳати 2500 метри мураббаъ иборат аст.
        Маҷмааи савдои замонавӣ, ки ба ифтихори ҷашни 90-солагии Душанбе номи рамзии «Пойтахт-90»-ро гирифтааст,  дар асоси фармоиши шаҳрдории Душанбе аз ҷониби ҶДММ «Строй-комплекас» дар зарфи ду сол сохта шудааст. Маҷмааи савдои «Пойтахт-90» дорои тамоми шароитҳои мусоиди замонавӣ буда, дар мавриди ба истифода додани он 900 нафар бо ҷойи кор таъмин мегардад, ки ин раванд ба беҳдошти вазъи иҷтимоии мардум ва баланд бардоштани сатҳи хизматрасонӣ ба аҳолӣ мусоидат  менамояд.