Суғд: истихроҷи ангишт дар Шӯроб 20% афзуд

Хуҷанд, 4.09.2014. (АМИТ “Ховар”, Абдуаҳад Шарифзода).- Дар коргоҳҳои истихроҷи ангишти вилояти Суғд истихроҷи ангишт   меафзояд. Тавре  ки ба “АМИТ Ховар”  аз маъмурияти коргоҳи  ҷамъияти саҳомии шакли кушодаи “Ангишт”-и шаҳраки Шӯроби шаҳри Исфара  иттилоъ доданд, ангиштканони коргоҳи мазкур иҷрову муқаррароти нақшаи ҳафтмоҳаи соли ҷориро барзиёд таъмин намуда, ба миқдори 27 ҳазору 474 тонна ангишт истихроҷ намуданд, ки ин нисбат ба нишондоди ҳамин давраи соли гузашта ба андозаи 5 849 тонна ва аз муқаррароти нақшавӣ 4 514 тонна,  яъне 19,7 % зиёд аст. Инчунин  дар  ин давра дар 1559 метри тӯлонӣ корҳои роҳкушоиву нақбканӣ анҷом дода шудаанд, ки дар муқоиса бо соли қаблӣ  219 метр бештар мебошад. 
Дар маҷмӯъ дар ҳафт моҳи соли ҷорӣ ангиштканони Суғд 306,5 ҳазор тонна ангишт истихроҷ карданд. 
Алъон дар миқёси Суғд 8 коргоҳи ангиштканӣ фаъолият дорад, 3-тои он дар ноҳияи Айнӣ, 2 коргоҳ дар ноҳияи Панҷакент ва Исфара ва 1 коргоҳ дар ноҳияи Кӯҳистони Мастчоҳ мебошад. Аз ин шумора коргоҳҳои “Фон-Яғноб”-и ноҳияи Айнӣ ва ҶСК “Ангишт”- ноҳияи Исфара аз зумраи калонтарин конҳои истихроҷи ангишт дар шимоли кишвар маҳсуб мешаванд. 
Бояд гуфт, ки барои омодагии аҳолӣ ба фасли тирамоҳу зимистон дар миқёси вилоят то кунун зиёда аз 1000 нуқтаи фурӯши ангишт ва нуқтаи гази моеъ ташкил шудааст.