“Водии Рашт — имкониятҳои рушд”

Душанбе, 12.09.2014. (АМИТ «Ховар», Мавчуда Анварӣ).-Аз 25 то 26 сентябри соли ҷорӣ дар шаҳраки Ғарм Анҷумани байналмилалии иқтисодӣ дар мавзӯи “Водии Рашт — имкониятҳои рушд” доир ба масъалаҳои рушди иҷтимоию иқтисодии ноҳияҳои водии Рашт (Рашт, Нуробод, Ҷиргатол, Тавилдара ва Тоҷикобод) баргузор мегардад.Чорабинӣ аз ҷониби Вазорати рушди иқтисод ва савдо ташкил гардида, мақсади баргузории он мониторинг, арзёбӣ ва ҳамоҳангсозии лоиҳаҳои гуногуни дар минтақаи мазкур татбиқшаванда, баррасии иҷрои нақшаи чорабиниҳои барномаҳои давлатии рушди иҷтимоию иқтисодии ноҳияҳои водии Рашт, ҷалби сармоягузориҳо ва муҳокимаи масъалаҳои беҳтар намудани шароит барои рушди соҳибкорӣ дар минтақаи мазкур мебошад.Инчунин дар доираи Анҷумани мазкур баргузории мизҳои мудаввар доир ба баррасии масъалаҳои рушди соҳибкорӣ (агробизнес, сайёҳӣ, ҳунарҳои мардумӣ), рушди иҷтимоии минтақа (маориф, тандурустӣ, баробарии гендерӣ ва ғайра) ва конфронси илмӣ — амалӣ ба нақша гирифта шудааст.Дар айни замон ҳайати Кумитаи тадорукот оид ба баргузории Анҷумани байналмилалии иқтисодӣ дар водии Рашт аз ҷумлаи намояндагони вазорату идораҳои дахлдори ҷумҳурӣ таъсис ва нақшаи чорабиниҳо доир ба омодагӣ ва баргузории чорабинии мазкур аз ҷониби Давлаталӣ Саид — муовини якуми Сарвазири Ҷумҳурии Тоҷикистон тасдиқ шудааст.Аз ин лиҳоз, Вазорати рушди иқтисод ва савдои Ҷумҳурии Тоҷикистон ҳамаи муассисаҳо, ассотсиатсияҳо ва ташкилотҳоро новобаста аз шакли моликияташон барои иштирок дар кори Анҷумани мазкур даъват менамояд. Агар шумо хоҳиши баромад намудан ё иштирок дар намоишгоҳи онро дошта бошед, метавонед ба суроғаи e-mail: infofez@mail.ru ё ин ки бо телефони 223-17-51 муроҷиат намоед.