Ҷашни забони давлатӣ дар Вазорати кишоварзӣ

 
 Душанбе, 2.10.2014. (АМИТ «Ховар», Зарангези Латиф).- Имрӯз дар Вазорати кишоварзии Ҷумҳурии Тоҷикистон барои дар амал татбиқ намудани Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон» ва бахшида ба ҷашни Рӯзи забони давлатӣ  ҷамъомади идонаи кормандон  доир гардид.
     Сардори шуъбаи матбуот ва иттилооти вазорат  Назрулло Дадобоев оид ба аҳамияти таърихии ин санаи муҳим сухан гуфта, ҳозиринро бо ҷашни Рӯзи забони давлатӣ табрик намуд.
Сармутахассиси шуъбаи матбуот ва иттилоот А. Каримова дар мавзӯи «Таърихи баргузории ҷашни Рӯзи забони давлатии Ҷумҳурии Тоҷикистон» маърӯза намуда, ба ҳозирин оид ба таърихи пайдоиш ва аҳамияти забони давлатӣ ва таҷлили сазовор ҷашнҳои  20-солагии Конститутсия (Сарқонун)-и Ҷумҳурии Тоҷикистон, 600-солагии Абдураҳмони Ҷомӣ ва 3000-солагии Ҳисор  маълумоти муфассал дод. 
Зикр кардан ба маврид аст, ки дар айни замон бо мақсади амалӣ намудани Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон»  дар вазорат ва зерсохторҳои он тамоми ҳуҷҷатгузорӣ пурра ба забони давлатӣ ба роҳ монда шудааст. Ҳамзамон матни  мӯҳру тамғаҳо ва лавҳаю овезаҳо новобаста  аз шакли  ташкилии ҳуқуқӣ ба забони давлатӣ омода гардидааст.