Даъвати донишҷӯён ба солимфикрӣ

 
Душанбе, 22.10.2014. (АМИТ «Ховар», Раъно Нусратуллозода).-Дирӯз дар  факултаи забонҳои хориҷии Донишгоҳи давлатии Хуҷанд ба номи академик Бобоҷон Ғафуров бо фарогирии донишҷӯёни ин факулта ва факултаҳои педагогӣ, молия ва қарз, телекоммуникатсия ва  технологияҳоои иттилоотӣ  чорабинии тарбиявӣ дар чаҳорчӯбаи силсилавохӯриҳои Раёсати донишгоҳ бо мақомоти ҳифзи ҳуқуқ ва тартибот баргузор гардид.
Тавре ки аз донишгоҳи мазкур иттилоъ доданд, мутахассиси пешбари шуъбаи тарбияи Раёсати донишгоҳ дотсент Маҳмудҷон Ӯлмасов зикр намуд, ки cолҳои охир дар макотиби олии кишвар баробари корҳои илмиву таълимӣ ба ҷараёни корҳои тарбиявӣ таваҷҷуҳи хосса зоҳир  мешавад, зеро тарбия падидаи иҷтимоӣ, фарҳангӣ, маърифатӣ, психологиву педагогӣ буда, барои танзими зиндагии инсон ва пешрафти  ҷомеа хидмат менамояд. 
Муовини сардори хадамоти пешгирии ҳуқуқвайронкунӣ байни наврасону ҷавонони Раёсати ВКД ҶТ дар вилояти Суғд, подполковники милитсия Пӯлодҷон Саидов  роҷеъ ба вазъи қонуншикании наврасону ҷавонон, хосатан донишҷӯён гуфт, ки солҳои охир вазъи ҳуқуқвайронкунӣ аз тарафи ин қишри ҷомеа ташвишовар гаштааст, зеро дар 9 моҳи соли гузашта аз тарави наврасону ҷавонон 811 ҷиноят содир шудаву ин рақам дар  ҳамин давраи соли ҷорӣ ба 946 адад расид, ки мутаассифона, дар байни онҳо донишҷӯён низ ҳастанд. 
Пӯлодҷон Саидов ҳамчунин дар бораи гаравидани ҷавонон ба ҳизбу ҳаракатҳои мамнӯъ ва оқибатҳои фоҷиабори онҳо мисолҳои дақиқ оварда,  донишҷӯёнро даъват кард, ки шукронаи ин сарзамин, ваҳдату оромӣ намуда, дар рушди кишвар ҳисса гузоранд.