Кумаки хайриявии «Амонатбонк» ба ятимон

Душанбе, 7.10.2014. (АМИТ “Ховар”, Мавҷуда Анварӣ).-Бонки давлатии амонатгузории Ҷумҳурии Тоҷикистон «Амонатбонк» бахшида ба Иди Қурбон ба тарбиятгирандагони мактаб-парваришгоҳи ятимону бепарасторони рақами 1-и шаҳраки Сомониёни ноҳияи Рӯдакӣ кумаки молиявӣ расонд. 
Дар ин мактаб-парваришгоҳ 1265 кӯдаку наврас таълими илм мегиранд, ки аз ин шумора як қисми муайянашон ятими кулл мебошанд. 
  Бояд гуфт, ки БДА ҶТ «Амонатбонк» бо супориши Ҳукумати мамлакат  сарпарастии мактаб-парваришгоҳи мазкурро ба зимма гирифта, дар ҳар иду арафа кумакҳои пулию молӣ мерасонад. Ин навбат низ ба маблағи 16 ҳазору 190 сомонӣ маводи хӯрока ва 6 кати дуқабата барои ҷои хоб бурда расонида шуд. 
  Тибқи иттилои Бонки давлатии амонатгузории Ҷумҳурии Тоҷикистон «Амонатбонк» аз соли 2007 то инҷониб бонк ба ин мактаб-парваришгоҳ ба маблағи беш аз 63 ҳазор сомонӣ кумакҳои гуногун расонидааст.