Маҷлиси навбатии Ҳукумати Ҷумҳурии Тоҷикистон

Душанбе, 10.10.2014 (АМИТ «Ховар», Фарзонаи Давлат).-Имрўз  таҳти раёсати Сарвазири мамлакат Қоҳир Расулзода маҷлиси навбатии Ҳукумати Ҷумҳурии Тоҷикистон баргузор гардид.
Дар маҷлиси навбатии ҳукумат нахуст масъалаи кадрҳо баррасӣ шуда,  аъзои нави ҳайати мушовараи Кумитаи забон ва истилоҳот, Саридораи бойгонӣ ва  Агентии давлатии суғуртаи иҷтимоӣ ва нафақа  тасдиқ гардиданд.
  Оид ба масъалаи якуми рўзномаи маҷлиси Ҳукумати Ҷумҳурии Тоҷикистон доир ба иҷрои моддаҳои дахлдори Кодекси замини Ҷумҳурии Тоҷикистон ҷиҳати пардохти  ҷуброни талаф оид ба баровардани заминҳо аз гардиши кишоварзӣ ҳисоботи Раиси Кумитаи давлатии идораи замин ва геодезӣ Маҳмадтоири Зокир шунида шуд. 
Лоиҳаи қарорҳои Ҳукумати Ҷумҳурии Тоҷикистон оид ба лоиҳаи як зумра  созишномаҳои байниҳукуматӣ баъди муҳокима қобили қабул дониста шуданд.
Лоиҳаи Қонуни Ҷумҳурии Тоҷикистон “Дар бораи арбитражи байналмилалии тиҷоратӣ” маъқул дониста шуда, ба баррасии Маҷлиси намояндагони Маҷлиси Олии Ҷумҳурии Тоҷикистон пешниҳод карда шуд. Ба баррасии Маҷлиси намояндагони Маҷлиси Олии Ҷумҳурии Тоҷикистон ҳамчунин лоиҳаҳои тағйиру иловаҳо ба як силсила  қонунҳои Ҷумҳурии Тоҷикистон пешниҳод гардид.
Дар фароварди  маҷлис Сарвазири мамлакат Қоҳир Расулзода  аз аъзои ҳукумат ва дигар  роҳбарони вазорату идораҳои дахлдори мамлакат иҷрои саривақтӣ ва босифати дастуру супоришҳои Президенти Ҷумҳурии Тоҷикистонро талаб намуда, барои таъмини рушди устувори иқтисодию иҷтимоӣ, афзун намудани иқтидори истеҳсолию содиротӣ, таъсиси ҷойҳои нави корӣ, ба кор андохтани корхонаҳои нави саноати сабук, афзун намудани истеҳсоли маҳсулоти кишоварзӣ ва истифодаи самараноки заминҳои кишоварзӣ, дар сатҳи зарурию  бе камбудӣ  гузаронидани давраи тирамоҳу зимистон   ва  ҳалли дигар масъалаҳои рўзмарраи ҳаёти ҷомеа ба масъулин дастуру супоришҳои мушаххас дод.