Муҳокимаи масоили ҳамкории Русия ва Тоҷикистон

Душанбе, 09.10.2014. (АМИТ «Ховар»,  Фарзона  Достонзода). — 7 октябр  дар  шаҳри  Хуҷанд ҷаласаи  якуми  клуби матбуотии «Суғдиён» дар  мавзӯи «Масоили муҳими  ҳамкории  Русия  ва  Тоҷикистон  дар  фазои  АвруОсиё  баргузор  гардид. 
Тавре  ки  аз  Намояндагии Созмони ғайритиҷоратии Бунёди рушди «Пажӯҳишгоҳи  таҳқиқи  АвруОсиё» — и  Русия  дар Ҷумҳурии  Тоҷикистон  ба  АМИТ «Ховар»  хабар  доданд,  дар  ҷараёни  ҷаласа   масоили  ҳамкории байниминтақавӣ   дар  бахши таҳсилоти  касбӣ,  муносибатҳои  тиҷоратию  иқтисодӣ,  соҳаҳои иттилооту  коммуникатсия, ҳамчунин   дурнамои   рушди   равобити   мустақими  иқтисодии   ниҳодҳои  Федератсияи  Русия  ва  Ҷумҳурии  Тоҷикистон  дар  заминаи  созишномаҳои  дуҷониба баррасӣ  шуданд.
Ба муҳокимаи  масоили аз  ҳамкорӣ  дар  фазои  АвруОсиё  сари вақт  ва  муфассал   воқиф  намудани  аҳолии  ҳар  ду  кишвар таваҷҷуҳи  хоса зоҳир  гардид. 
Тасмим  гирифта   шуд, ки моҳе  ду  маротиба ҷаласаи  клуб   доир  карда  шавад. 
Клуби   матбуотии «Суғдиён» — ро  Намояндагии Созмони  ғайритиҷоратии Бунёди  рушди «Пажӯҳишгоҳи  таҳқиқи  АвруОсиё» — и  Русия  дар  Ҷумҳурии  Тоҷикистон таъсис  дода  ва он бо  дастгирии   рӯзномаи  вилоятии «Согдийская  правда»  фаъолият  дорад. Мақсади  асосии  фаъолияти  клуби  матбуотӣ иборат  аз муттаҳид  сохтани ҷамоаи  журналистон  ба  манзури  таълиму табодули  таҷриба,  ҳамкорӣ  бо  намояндагони  мақомоти ҳокимияти  давлатӣ,  беҳдошти  сифати воқифияти  аҳолии  Русия ва  Тоҷикистон  аз  вусъати  раванди  ҳамгироии   АвруОсиё  мебошад.