Сӯхтори шадид дар Ню-Ҷерсии Амрико

  Душанбе,16.10.2014. (АМИТ «Ховар», Иброҳими Ҳабибуллоҳ).- Ҳафтаи равон дар шаҳри Мунакии иёлати Ню-Ҷерсии ИМА  бар асари  таркиш дар  коргоҳи  кимиёвии марбут ба ширкати «Крис-Фом-Индастри» 3 нафар  шадидан маҷрӯҳ шуд. Гуфта мешавад, ки ҳангоми сар задани сӯхтор  дар дохили коргоҳи кимиёвӣ  17 нафар қарор дошт. Аз рӯи санҷиши мутахассисони соҳаи мазкур таркиш бар асари ангезаи  моддаҳои кимиёвӣ  сар задааст. 
 
Душанбе,16.10.2014. (АМИТ «Ховар»).-Кормандони соҳаи тандурустии  Канада  бо гумони сироят аз вируси марговари  маризии  табларзаи «Эбола» 2 нафар сокини  шаҳрҳои Оттава ва Беллвиллии Африкои ғарбиро  таҳти ташхису табобати  махсус қарор доданд. 
 
Душанбе,16.10.2014. (АМИТ «Ховар»).-Дирӯз кормандони Хадамоти гумруки Федератсияи Русия дар фурудгоҳи байналмилалии «Шереметево»-и  шаҳри Маскав  зимни амалиёти махсус аз бордони  як мусофири хатсайри Ҷумҳурии Мардумии Чин 60 килограмм маводи мухаддири синтетикиро мусодира карданд. Нисбат ба боздоштшуда  парвандаи ҷиноӣ боз шуда, тафтиш идома дорад. 
 
Душанбе,16.10.2014. (АМИТ «Ховар»).- Муассисаи марказии молиявии Шведсия -«Риксбанк» ба олими муқтадири иқтисоддони фаронсавӣ Жан Тирол барандагии ҷоизаи Нобел оид ба  иқтисодиёт дар соли 2014-умро пешниҳод намуд. Гуфта мешавад, ки Жан Тироли 61-сола буда,  дар донишгоҳи Тулуза фаъолият дошта, ба омӯзиши бозорҳои соҳавӣ, назарияи бозиҳо ва ангезаҳои марбут ба танзим машғул мебошад.  Мукофотпулии ҷоизаи Нобел 8 миллион крони шведӣ ё худ 880 ҳазор евроро ташкил медиҳад.
 
Душанбе,16.10.2014. (АМИТ «Ховар»).-Шаби гузашта силоҳбадастони гуруҳи ифротгарои «Давлати исломӣ» пойгоҳи низомии воқеъ дар  музофоти Анбари Ироқро муҳосира карданд. Ба муқобили  ин созмони хатарнок неруҳои низомии кишварҳои эътилоф таҳти сарварии Иёлоти Муттаҳидаи Амрико муборизаи оштинопазир мебаранд.