Таҷлили иди касбии кормандони бахши фаврӣ

Душанбе, 7.10.2014. (АМИТ “Ховар”, Мавҷуда Анварӣ).- 5-уми октябри соли ҷорӣ дар Вазорати корҳои дохилӣ ҷаласаи тантанавӣ бахшида ба иди касбии кормандони бахши фаврӣ баргузор гардид.
Тибқи иттилои корманди вазорати мазкур Хусрав Солеҳов, вазири корҳои дохилӣ Рамазон Раҳимзода кормандони мақомоти корҳои дохилӣ, собиқадорон ва кормандони самти фавриро бо рӯзи таъсисёбиашон   табрик намуда, дар кори масъулиятноку бошараф ва заҳматталабу боифтихорашон барору комёбӣ таманно намуд. Рамазон Раҳимзода зикр кард, ки мақомоти милитсияро бе сохтори кофтукови ҷиноятӣ наметавон тасаввур намуд, зеро асоси фаъолияти ин ниҳодро маҳз ранҷу заҳмати  кормандони кофтукови ҷиноӣ ташкил дода, фаъолияти дигар ҷузъу томҳо аз натиҷаи кори онҳо сарчашма мегиранд.
Дар  чорабинии тантанавӣ бо фармони вазири корҳои дохилӣ     барои хизматҳои софдилона ва содиқона, зоҳир намудани маҳорату малакаи баланди касбӣ дар таъмини муҳофизати тартиботи ҷамъиятӣ ва волоияти қонун, пешгирӣ ва ошкор намудани ҷиноят, ҳифзи манфиатҳои қонунии шаҳрвандон ва интизоми намунавӣ, инчунин бахшида ба муносибати таҷлили ҷашни таъсисёбии раёсати кофтукови ҷиноии ВКД Ҷумҳурии Тоҷикистон як зумра кормандон   бо нишонҳои сарисинагии «Корманди беҳтарини фаврӣ»,  «Барои хизматҳои аъло дар ВКД»,  медали «Барои хизмати шоён» ва  тӯҳфаҳои хотиравӣ қадрдонӣ шуданд.