Темурмалик: омодагӣ ба давраи зимистон

Темурмалик, 1.10.2014. (АМИТ «Ховар», Сулаймони Хол).-Дар ноҳияи Темурмалик ҳамаи корхонаю ташкилотҳо ба маъракаи зимистонгузаронӣ омодагӣ мебинанд. Дар 46 муассисаи таълимии ноҳия ва се боғчаю 2  интернат  дар айни замон 305 тонна ангишт, 340 метри куби ҳезум ва 30 тонна мазут захира шудааст, ки муассисаҳо метавонанд зимистони солҳои 2014-2015-ро бомуваффақият паси сар намоянд.
Тавре ки сардори раёсати ҷамъияти матлуботи ноҳия иброз намуд,    матлуботчиёни ноҳия бо истифода аз шароити мавҷуда мағозаҳои фурӯши ангиштро дар ноҳия фаъол гардонида, қисми зиёди муассисаю идораҳоро бо ин намуди сӯзишворӣ таъмин намудаанд. 
Муассисаҳои тандурустии ноҳия низ ба ин маъракаи муҳим омодагӣ дида истодаанд.
Беморхонаи марказӣ, ки дорои 10 шуъба ва чор шуъбаи ёрирасон мебошад, бо барқи доимӣ таъмин буда, дар соли ҷорӣ дар он 16,4 тонна ангишт ва 5 метри кубӣ ҳезум захира шудааст.