Вохӯрӣ бо муҳоҷирони меҳнатӣ дар Благовешенск

Душанбе, 16.10.2014. (АМИТ «Ховар», Лайло  Тоирӣ). – Чанде  пеш  роҳбарияти Маркази  фарҳанги  миллии «Дӯстӣ» — и  ҷамоаи тоҷикон  дар  шаҳри  Благовешенски Федератсияи  Русия  бо  муҳоҷирони  меҳнатӣ вохӯрӣ  доир  намуд.
Тавре ки  котиби  матбуоти  Намояндагии  Хадамоти  муҳоҷирати   ҶТ  дар  ФР  Иброҳим  Аҳмадов  хабар  дод,  дар  ҷараёни  вохӯрӣ  масоили   будубош ва  фаъолияти  меҳнати  шаҳрвандони  Тоҷикистон  дар  ин  минтақа  мавриди  муҳокима  қарор  гирифтанд. Иштирокдорони  вохӯрӣ аз талаботи  нави қонунгузории  Русия  дар  бахши  муҳоҷират  воқиф  шуданд. Дар  ҷараёни  суҳбат  ба  саволҳои  муҳоҷирони  меҳнатӣ дар  мавриди  ба  расмият   даровардани  ҳуҷҷатҳои  иҷозавӣ  барои  фаъолияти  меҳнатӣ  дар  шароити  ба  мавқеи  иҷро  расидани  қоидаҳои нав  посух  дода шуд. 
Ёдовар  мешавем, ки аз  1  январи  соли  2015  шаҳрвандони  Тоҷикистон  бояд  фақат  бо шиносномаҳои  хориҷӣ  ба  Федератсияи  Русия  сафар  карда, ҳангоми  супурдани  ҳуҷҷатҳо барои  гирифтани  санадҳои   иҷозавӣ ҷиҳати  фаъолияти  меҳнатӣ шаҳодатномаро  дар  бораи  гузаштан аз  санҷиш  ба  манзури   донистани  забони русӣ,  асосҳои  қонунгузорӣ  ва таърихи  Русия  пешниҳод  кунанд. 
Мувофиқи  маълумоти  расмӣ  то имрӯз  дар  ҳудуди  ФР қариб  400 марказ  фаъолият  дорад,  ки  дар  онҳо  аз  санҷишот  гузашта  ва  шаҳодатномаи дахлдорро ба  даст овардан мумкин аст.