Баррасии маълумоти оморӣ дар ситоди ҷумҳуриявӣ

Душанбе, 24.11.2014. (АМИТ “Ховар”, Зарангези Латиф).- Дар Вазорати кишоварзии Ҷумҳурии Тоҷикистон таҳти роҳбарии вазир Қосим Роҳбар оид ба ҷамъоварии зироатҳои кишоварзӣ, шудгори заминҳо ва кишти тирамоҳии зироатҳо Ситоди ҷумҳуриявии навбатӣ доир гардид. 
Қосим Роҳбар намояндагони гурӯҳҳои кориро, ки ҳафтаи сипаригардида ба мақсади назорати ҷамъоварии ҳосили пахта, шудгор ва кишти тирамоҳӣ, ҳамзамон расонидани кумаки амаливу методӣ ба кишоварзони хоҷагиҳои деҳқонии вилоятҳо ва шаҳру ноҳияҳои ҷумҳурӣ  сафари корӣ анҷом доданд, пурсон шуд.
Зикр шуд, ки кишоварзони ҷумҳурӣ дар ҷамъоварии  ҳосили пахта,  шудгор ва кишти тирамоҳӣ новоста аз номусоид омадани ҳавои имсола  корҳои муайянро  анҷом додаанд. Вазири кишоварзӣ ҳайати гурӯҳи кориро вазифадор намуд, ки  оид ба сари вақт ҷамъ овардани ҳосили пахта, ки ҳанӯз дар саҳро зиёд аст ва ворид намудани он ба маълумотҳои оморӣ  корҳои амалиро ба анҷом расонанд.