Г. Полтавченко: Квотаи донишҷӯёни тоҷик зиёд мешавад

 
Душанбе, 10.11.2014 (АМИТ «Ховар», Мавҷуда Анварӣ).-    Губернатори шаҳри Санкт-Петербурги Федератсияи Русия Георгий Полтавченко дирӯз баъди мулоқот бо Президенти кишвар Эмомалӣ Раҳмон дар ҳузури   хабарнигорон чунин изҳори андеша намуд:
«Зимни мулоқот бо Президенти Ҷумҳурии Тоҷикистон муҳтарам Эмомалӣ Раҳмон мо як силсила масоили вобаста ба муносиботи дӯстӣ ва ҳамкории гуногунҷанбаи Тоҷикистону Русия ва беш аз ҳама, шаҳри Санкт-Петербург бо шаҳри Душанберо мавриди баррасӣ қарор додем. Ба назари мо захираҳои ҳамкорӣ байни ду шаҳр хеле зиёд ҳастанд, ба монанди электроэнергетика, чун шаҳри Санкт — Петербург дорои комплекси бузурги мошинистеҳсолкунӣ мебошад, ҳамчунин ба роҳ мондани ҳамкориҳо дар соҳаи истеҳсоли маводи ғизоии босифат барои истеъмолкунандагони шаҳри Санкт- Петербург».
Тавре ки губернатори шаҳри Санкт-Петербург зикр намуд, минбаъд миёни сохторҳои гуногуни ин шаҳрҳо ҳамкории пурсамари бевосита, аз ҷумла дар самти омӯзиши забони русӣ ва ихтисосҳои коргарӣ дар шаҳри Душанбе ба муҳоҷирони кории эҳтимолӣ ва ба корхонаҳои мушаххас ба кор бурдану бо шароити зарурӣ таъмин намудани онҳо дар шаҳри Санкт-Петербург ба роҳ монда мешавад. 
«Бештари мутахассисони дар айни замон дар соҳаи истеҳсолоту савдо фаъолияткунандаи Тоҷикистон дар муассисаҳои олии шаҳри мо таҳсил кардаанд. Дар айни ҳол дар муассисаҳои олии касбии Санкт-Петербург наздики 700 донишҷӯи тоҷик таҳсил дорад. Мо ният дорем, ки шумораи квотаҳоро барои донишҷӯёни тоҷик пеш аз ҳама дар донишгоҳҳои гуманитарӣ, махсусан дар Донишгоҳи омӯзгории шаҳр зиёд кунем. Ҳамчунин дигар масъалаҳои ҳамкориҳо, дӯстии байниҳамдигарӣ, ҳамдигарфаҳмӣ ва шарикии стратегӣ низ мавриди баррасӣ қарор дода шуданд. Мувофиқи созишномае ки мо бо шаҳрдории Душанбе ба имзо расонидем, муҳоҷиронро дар ҳудуди Тоҷикистон омода мекунем ва онҳо мувофиқи самти фаъолияти интихобкардаашон ба кор дар Русия ҷалб  мешаванд»,-илова намуд Георгий Полтавченко. 
Дар интиҳо губернатори шаҳри Санкт-Петербург Георгий Полтавченко ба Ҳукумати Ҷумҳурии Тоҷикистон, ба роҳбарияти пойтахт ва умуман ба тамоми  мардуми Тоҷикистон ҷиҳати меҳмоннавозии гарму самимиашон изҳори миннатдорӣ намуд.