Идораи стратегии рушди инсонӣ

 
Душанбе, 25.11.2014. (АМИТ «Ховар», Раъно Нусратуллозода).-Бо ташаббуси факултаи менеҷмент ва ҳуқуқи молиявӣ ва кафедраи менеҷменти раёсати илми Донишкадаи молия ва иқтисоди Тоҷикистон, бахшида ба 20-умин солгарди рӯзи қабули Конститутсия (Сарқонун)-и Ҷумҳурии Тоҷикистон 24 ноябри соли ҷорӣ дар мавзӯи «Идоракунии стратегии рушди инсонӣ» мизи мудаввари илмӣ-назариявӣ доир гардид.
Бино ба иттилои котиби матбуоти донишкадаи мазкур Машҳура Абдуллоева дар мизи мудаввар муовини ректор оид ба илм Ғиёсиддин Ашуров иброз дошт, ки дар шароити муосир истифодаи самараноки захираҳои меҳнатӣ зарур буда, он имконияти ҷисмонию зеҳнӣ ва қобилияти истеҳсоли неъматҳои моддиро дар худ таҷассум мекунад.
Баъдан маърӯзаҳои Шавкат Бозоров, профессори кафедраи менеҷмент дар мавзӯи «Муаммоҳои идоракунии стратегии рушди инсон» ва Дилбар Амонова, профессор, мудири кафедраи менеҷменти Донишгоҳи славянию русии Тоҷикистон дар мавзӯи «Асосҳои рушди иҷтимоию иқтисодии Ҷумҳурии Тоҷикистон ва таъсири он ба рушди инсонӣ» шунида шуданд. Дар онҳо гуфта шуд, ки идораи захираҳои инсонӣ низоми мутақобилаи қарорҳои ташкилию иқтисодӣ ва иҷтимоӣ доир ба ташкили шароит барои амалнамоии муқаррарӣ, рушд ва истифодаи самараноки иқтидори қувваи корӣ дар сатҳи ташкилот мебошад. Захираҳои инсонӣ нисбат ба дигар захираҳо хусусияти хосса дошта,шуури ташаккулдодашуда ва натиҷаи истифодаи он ба худ хусусияти эҳтимолиро мегирад.