Камол — кимёи Табрезу Хуҷанд

Душанбе, 18.11.2014. (АМИТ «Ховар», Зарангези Латиф).- Маросими бузургдошти Камоли Хуҷандӣ, шоири шинохтаи тоҷик таҳти унвони «Камол — кимёи Табрезу Хуҷанд» дар Фарҳангсарои андешаи шаҳри Теҳрони Ҷумҳурии Исломии Эрон доир шуд.
Дар он масъулони фарҳангии кишварҳои Тоҷикистону Эрон ширкат варзиданд. Аз ҷумла, раиси вилояти Суғд Абдураҳмон Қодирӣ зимни иштирок  аз меҳмоннавозии эрониён изҳори ташаккур намуд ва афзуд, ки бо роҳбарии Президенти Ҷумҳурии Тоҷикистон  муҳтарам Эмомалӣ Раҳмон дар Тоҷикистон ҳамасола барои бузургдошти шахсиятҳои бузург чорабиниҳои гуногуни сатҳи байналмилалӣ доир мешаванд.
Абдураҳмон Қодирӣ аз ҷашни таҷлил аз шаҳри Хуҷанд дар соли 2020 тавассути созмони ҷаҳонии ЮНЕСКО хабар дод. Ӯ дар ҳузури аҳли фарҳанги Эрон гуфт, ки мо бо фарҳангу забони муштарак ҷонибдори густариши робитаҳо ҳастем.
Ба иттилои дафтари матбуоти раиси вилояти Суғд, дар маросими бузургдошти Камоли Хуҷандӣ дар Теҳрон сафири Тоҷикистон дар Эрон Неъматуллоҳ Эмомзода низ сухан гуфта, изҳори умед кард, ки ин шабнишинӣ барои ошноии бештари аҳли фарҳангу адаби кишварҳои дӯст мусоидат хоҳад кард.
Фарзонаи Хуҷандӣ, шоираи мумтози тоҷик, ки дар ин ҳамоиш иштирок дошт, суханронии худро бо қироати шеъре аз Камоли Хуҷандӣ оғоз бахшид ва дар идома гуфт: исми осори шайх Камоли Хуҷандиро «қанди баста» мегузорем. Осори Камол мисли хони малоҳат аст, ки аз он ҳамвора баҳра мебардорем.
Дар маросими бузургдошт ҳамчунин раиси Анҷумани дӯстии Тоҷикистону Эрон доктор Шабистарӣ, прафессор Фахриддин Насриддинов, Аҳмадҷони Раҳматзод, доктор Асғари Додбеҳ, устоди донишгоҳи Аллома Таботабоӣ, доктор Довуд Аминӣ, доктор Маҳдии Муҳаққиқ ва дигарон сухан гуфтанд.