Мавъизаи зарари истеъмоли маводи марговар дар намозҳои ҷумъа

Душанбе, 11.11.2014 (АМИТ «Ховар», Мавҷуда Анварӣ).- Кормандони Раёсати Агентии назорати маводи нашъаовар дар вилояти Суғд бо мақсади муаррифӣ ва татбиқи «Стратегияи миллии мубориза бар зидди муомилоти ғайриқонунии маводи мухаддир дар ҶТ барои солҳои 2013-2020» бо табақаҳои мухталифи аҳолӣ доир ба паёмадҳои ҳуқуқӣ, тиббӣ ва иҷтимоии зуҳуроти нашъамандӣ ва нашъаҷаллобӣ, ҳамчунин бобати пешгирии ҳолатҳои пайвастани ҷавонону наврасон ба созмону ҳаракатҳои ифротиву тундгаро дар шаҳру ноҳияҳои вилояти Суғд дар охири ҳафтаи гузашта вохӯриҳои фаҳмондадиҳӣ баргузор намуданд.Дар толори мақомоти иҷроияи ҳокимияти давлатии ноҳияҳои Ашт, Б.Ғафуров, Мастчоҳ, шаҳрҳои Истиқлол, Чкалов ва Истаравшан бо ҷалби фаъолони ноҳия чорабинии васеъ баргузор гардида, дар баробари шарҳу тавзеҳи стратегия вазъи нашъамандӣ дар ин минтақаҳо мавриди баррасӣ қарор дода шуд. Чунин чорабинӣ дар шаҳри Исфара низ баргузор гардида, дар радифи хонандагони мактабҳои таҳсилоти миёнаи умумӣ ва муҳассилини коллеҷи тиббии шаҳр, раисони ҷамоатҳо, имомхатибони масҷидҳои шаҳр ширкат намуданд. Имомхатибон оид ба ҳаром будани манфиате, ки аз муомилоти ғайриқонунии маводи нашъаовар ҳосил мешавад ва кайфияту ҳаловат аз истеъмоли маводи мухаддир ҳарф зада, таъкид доштанд, ки масъалаи пешгирии ҷавонон аз даст задан ба хариду фурӯши маводи нашъаовар ва истеъмоли чунин маводи марговар ҳамеша дар маркази диққат буда, зимни баргузории намозҳои ҷумъа оид ба масъалаи мазкур мавъизаҳо хонда мешаванд.Силсилавохӯрии намояндагони Раёсати агентӣ дар вилояти Суғд дар шаҳри Конибодом низ доир гардид. Дар толори мақомоти иҷроияи ҳокимияти давлатии шаҳр бо ҳузури роҳбарияти ноҳия, ҷомеаҳои меҳнатӣ, донишҷуёни коллеҷҳои тиббӣ ва омӯзгории шаҳр, муаллимон ва хонандагони мактабҳои таҳсилоти миёнаи умумӣ суҳбати озод баргузор гардид.